cc via Flickr user Neil Crosby
承上文，我跟朋友們一行三人展開了這個八天七夜、讓人啼笑皆非的旅行。
旅行團的第一天基本上無甚行程可言，因要從位處加州的洛杉磯，經內華達州、亞利桑那州，一直趕到到位處猶他州的小城 Richfield，車程已需九個小時，中途還要停一下休息站供團友吃飯放水之類，已不剩甚麼餘暇。
趕路趕路，你大概會以為第一天的旅程應不會有甚麼值得記下吧？
那你就大錯特錯了。
午飯過後，正當團友們都飯氣攻心嘗試小睡片刻之時，導遊先生突然提出了一個建議，把我嚇了一大跳。
他說：「我地將會一齊渡過一個星期，不如大家都自我介紹互相認識下丫。」
你冇睇錯，係：自．我．介．紹。
嘩！呢一樣咁 Old School 嘅嘢，真係諗唔出幾多百萬年無做過。
呢個都唔係重點，個問題係點解要迫我要喺一班我無興趣識嘅人面前介紹自己先？
你話我知，點解要迫我陪你癲先？
真係完全唔理解呢個究竟係咩玩法。
當我同我旅伴聽到呢個消息，除左 O 嘴之外真係唔知仲可以有咩反應。
不過，佢地只係愕左一愕，然後就好安然咁繼續昏睡。
點解？
因為導遊只係要求每個「家庭」（他喜歡把每個參團單位視作一個家庭）派出一位代表去自我介紹，而佢地就好齊心咁用奸狡的眼神望住我然後推我落火坑。
你話，呢啲人係咪好冇義氣丫？
距離自我介紹開始仲有一段時間。
我就一直喺到度稿，思考究竟點先可以用最精簡的言辭完成任務，同時避免尷尬太耐。
諗下諗下，行刑的時刻終於來臨。
由於本家庭的座位較前，所以好快就輪到我，免卻等候的痛苦。
由於前面的團友們都說得頗為簡短，我也就仿傚他們，以九秒九的速度把自己和旅伴們的名字、來自香港、是交換生之類的資料說了一遍，然後為照顧不同國籍團友的需要雙語廣播了一下（其實是我忍受不了導遊的爛英語），光速地完事。
原以為之後的自我介紹都會像我如此簡短，畢竟我覺得大家也應想避免尷尬吧。
但是，我又錯了。
好戲在後頭。
（對唔住，我又吊大家癮了。）
Herman Mok 